ثار طبيش:$

......



كان طبيش يقود سيارته بسرعه جنونيه وهو شارد الذهن .. ويمسك بإحدى يديه مقود السيارة بينما اليد الأخرى تحمل الورقه التي كانت السبب في شروده الذهني .. أعاد طبيش النظر في الورقه وقراءتها .. (( يااااااالهوي يااااااالهوي .. ابوك إتئتل ياطبيش .. إلحئني يابني .. آآآآآآآه ياااااااني )) ..




سقطت دمعه من عين طبيش وهو يقرأ الرساله التي كانت من أمه حنفيه والتي كانت تخبره بأن أبوه شداد قد قتل .. وبينما طبيش غارق في حزنه سمع صوت يقول له .. ياطبيش ابوك يعز عليك ..؟؟
رد طبيش : وش اللي ابوك يعز عليك .. اللي يسمعك هالحين يقول إنك تتكلم عن واحد دارس معاي الثانوي ... اكيد ابوي يعز علي واعتبره مثل أمي ...
ورجع الصوت يقول لطبيش .. ياخوي تراه أبوك يعني ماله داعي تزعل عليه كل هالزعل .. أجل لو انه ولد عمك وش بتسوي ..!!!
إلتفت طبيش على يمينه وقال .. والله انك صادق .. بس ياكندره انا أول مره يموت ابوي .. عشان كذا متأثر ..!!
رد عليه الكندره .. يارجال وسع صدرك .. شفني انا ابوي مات أكثر من مره وعادي ماصار شي ...
طبيش .. يعني تتوقع ابوي يعيش ..؟؟؟
الكندره .. يارجال انت لا تكبر الموضوع كلها حبتين بنادول ويرجع مثل أول وأحسن ..



كان الشخص الذي يجلس بجانب طبيش في السيارة هو صديقة الكندره .. ودعونا في أسطر قليله نتعرف على طبيش والكندره ونعرف نبذه عن حياتهم قبل أن نبحر في حكايتنا .. حكاية ثار طبيش ..



طبيش .. ولد في الصحراء .. وبالتحديد في قبيلة الشيخ فجحان المحدوده .. أبوه شداد يعمل راعي عند الشيخ فجحان .. وكان شداد من أغنياء القبيله وفرسانها قبل أن يخسر كل أمواله في إحدى صفقات البعارين .. حيث اشترى مجموعه كبيره من البعارين وماتت بعد أقل من اسبوع .. وكان شداد قد تزوج من حنفيه أخت الشيخ حنفي شيخ قبيلة حنفي وأخوانه .. حيث كان شداد في رحلة عمل في قبيلة حنفي واخوانه ورأى حنفيه وأعجب بها وبجمالها وطلب من أخوها الزواج منها فوافق وتم الزواج وأخذها إلى قبيلته .. ورزق شداد وحنفيه بولدهم طبيش .. وكبر طبيش وأرسله أبوه إلى اخواله لكي يدرس عندهم .. لأن قبيلة الشيخ حنفي كان يوجد بها مدارس .. وعندما أنهى طبيش المرحله الثانويه أرسله أبوه إلى مدينة الرياض ليبحث عن عمل هناك ..



وفي المدينه تعرف طبيش على صديقه الكندره .. وكان الكندره أغبى مخلوقات الله لدرجة أنك عندما تقابله تحس إنك واقف قدام صندوق طماط من زود الدلاخه .. كما أن الكندره عندما أجريت له بعض الفحوصات في أحد المستشفيات تبين أنه متوفي دماغياً .. حيث أن جسمه يتحرك ولكن عقله ميت ومتوقف عن العمل ..!!



وكان طبيش لايعرف من البداوه إلا اسمها لأنه تربى في قبيلة حنفي المتطوره قليلاً .. وهذا ماجعله مكروهاً في قبيلته واصبحوا ينادونه الرخمه في .. واحياناً ينادونه الحضري المخنز ..


وفي أحد الأيام جاءت رساله إلى طبيش من أمه تخبره أن ابوه انقتل .. وأن عليه الحضور حالاً .. وهذا ماجعل طبيش يعود إلى قبيلته مسرعاً برفقة صديقه الكندره ..



وصل طبيش والكندره إلى قبيلة الشيخ فجحان .. وكان أفراد القبيله مجتمعين في خيمة الشيخ فجحان .. دخل طبيش ومعه الكندره إلى الخيمه .. وقام الشيخ فجحان ومن معه بالسلام على طبيش وتعزيته في موت والده .. وبعد أن تلقى طبيش واجب العزاء جلس وبجانبه صديقه الكندره .. وفي هذه اللحظه تكلم الشيخ فجحان وقال .. متى تبينا نصلي على ابوك ياطبيش ..؟؟
رد طبيش ببلاهه : والله لو ان ابوي سجاده عشان تصلون عليه ..!!
وحاول الشيخ فجحان أن يتدارك الموقف وقال .. خلاص خلاص بنصلي عليه بعد صلاة العصر وبعدها ندفنه ..
رد طبيش .. وش اللي تدفنونه ليش ناوين تسوون ابوي مندي ..!!!
الشيخ فجحان .. ماعليه ياطبيش يمكن ان الصدمه مأثره فيك وماتدري وش تقول لكن لازم ندفن ابوك لأن اكرام الميت دفنه ...
طبيش .. ياجماعه ماله داعي الرسميات ولا تخلون الموضوع رسمي .. عادي ارموا ابوي في اقرب برحه .. مايحتاج دفن ورسميات ولا قسم بالله لو يموت ابوي مره ثانيه ما أجيكم ..!!
وقام الشيخ فجحان وهو معصب وقال .. ياخوي مسيحي انت .. وش اللي رسميات وخرابيط .. يالله قوموا ياجماعه خلونا نغسل الميت ونجهزه للدفن ..



وقاموا جماعة الشيخ فجحان وبقي طبيش والكندره في المجلس .. ونظر الكندره الى طبيش وقال : والله لو ادري ان السالفه فيها رسميات ماجيت معاك ..
طبيش : ياخوي وش اسوي لهم .. انا لو علي كان رميت ابوي في اقرب مكان وخليته .. لكن انت عارف البدو وحركاتهم يحبون الهياط الله يهديهم .. غسل ودفن ومادري ايش .. ياخي مادري ليش احس ان اللي ميت تيس موب ابوي ..!! لكن قوم معاي ياكندره خلنا نسلم على أمي على بال مايخلصون الجماعه ..




توجه طبيش والكندره إلى خيمة ام طبيش .. ودخل طبيش على أمه بينما الكندره ينتظره في الخارج .. ووجد طبيش امه حزينه وتبكي ... وقال طبيش .. سلامات يمه وش فيك تبكين ..
ردت أمه .. شفت ياطبيش .. ابوك اتئتل .. ابوك انخطف مننا ..
طبيش .. وش اللي ابوي انخطف والله لو انه بنت .. الله يهديك يمه بس تعوذي من ابليس ولا تكبرين الموضوع ...
وزاد بكاء حنفيه أم طبيش وقالت .. أكبر الموضوع اييييه يامعفن .. بأولك ابوك انئتل وتئول ماتكبريش الموضوع .. امشي من وشي الساعه دي لأحسن والله العظيم ثلاثه اخليك تلحق ابوك ...!!
قال طبيش وهو يغادر الخيمه : أما الحق ابوي .. ارنب ذا موب ابو ....
وزاد صراخ أم طبيش وهي تقول : رحت فين ياشداد وسبتلي المصيبه دي .....
وقف طبيش ورد باستغراب : من شداد ذا ...؟؟؟؟
قالت أم طبيش : شداد اسم ابوك يامعفن ....
وانصدم طبيش وقال : أمااااااا اسم ابوي شداد .. وانا محترمه كل هالسنين وآخرتها يطلع اسمه شداد .. زين انه مات أجل ولا كان تفلت في وجهه هو واسمه ..!!!!
وفي هاللحظه انفجرت أم طبيش في ابنها : اطلع بررررا ياوسخ يامعفن ....
رد طبيش وهو طالع من خيمة أمه : خلاص خلاص باطلع .. بعدين إذا أنا معفن أجل انتي وشو .. أول مره أشوف أم ريحتها تونه ..




خرج طبيش الى صديقه الكندره .. وقال له الكندره : هاه بشر وش صار معاك ..؟؟
طبيش : ياخوي ابوي شكله مسوي بلوه .. كل ماكلمت أحد لقيته زعلان عليه ..!!
الكندره .. يارجال وسع صدرك هم دايم كذا الآباء ينكبون عيالهم .. وصدق المثل اللي قال : اذا كبر ابوك خاويه ..!!



وبعد أن تمت مراسم الدفن والعزاء .. اجتمع طبيش والكندره مع باقي رجال القبيله في مجلس الشيخ فجحان .. وقال الشيخ فجحان : شوف ياطبيش .. ابوك انقتل وانت لازم تآخذ ثار ابوك ..
رد طبيش .. والله السياره ماتكفي .. لكن خلو ثار ابوي عندكم .. والمره الجايه باجيب دينّه واحملّه معي ..
وتدخل الكندره وقال .. لا لا ياطبيش فيه مكان في المرتبه اللي ورى .. ماله داعي نروح ونرجع ..!!
رد الشيخ فجحان بغضب : ياخوي حمار انت وياه .. وش اللي دينّه والمرتبه اللي ورى وخرابيط .. دولاب هو .. ثار ابوك يعني انت لازم تقتل اللي قتل ابوك فاهم ولا لا ..!!
رد طبيش بعد أن بلع ريقه من الخوف : اوووف السالفه فيها قتل .. لا ياخوي فكوني أصلاً انا ما أداني ابوي .. واصلاً زين انه انقتل .. وش هالابو اللي اسمه شداد .. اسم كلب ذا موب اسم ابو ..
وتدخل الكندره : صادق صادق حتى هو كان دايم يقول ان ابوه يقرب له من بعيد وانه مايدانيه ..
رد الشيخ فجحان بغضب .. كلك تبن انت وياه .. وثار ابوك ياطبيش لازم تآخذه انت بنفسك عشان ماتجيب العار للقبيله .. وان ما أخذت ثار ابوك بنذبحك ذبحة الكلب انت وخويك ..
بلع طبيش والكندره ريقهم من الخوف وقال طبيش .. طيب ياشيخ وش درانا من اللي قتل ابوي ..؟؟؟
قال الشيخ فجحان .. احنا نعرف من اللي قتل ابوك .. اللي قتله قطّاع طريق وحرامي اسمه محماس ..!!
قال طبيش .. محماس .. اسم مطعم ذا موب آدمي .. طيب ياشيخ وين نلقاه هذا ..؟؟؟
رد الشيخ فجحان .. هو ماله مكان محدد .. انتم دوروه في البر وبتلقونه .. وانا راح اعطي كل واحد منكم خيل وسيف عشان تدورونه .. يالله قوم انت وياه وتجهزوا ..





وتجهز طبيش والكندره وعطى الشيخ كل واحد منهم خيل وسيف .. وراح طبيش يودع أمه وقال لها : يمه انا باروح آخذ ثار ابوي .. توصين على شي من هناك ..!!
قالت له أمه : روح يابني ربنا يجعل لك في كل خطوه سلامه , ربنا يبعد عنك ولاد الحرام , ربنا ينور طريقك .. رب.....
قاطع طبيش امه وقال : خلاص يمه خلاص .. ليش تحسسيني اني جالس في خطبة الجمعه .. يلعن ابليسك يمه من يوم عرفتك وانتي تدعين لي ولا تغير فيني شي ..!!!
وزعلت أم طبيش وقامت تدعي عليه : روح ربنا يأخدك , ربنا ينيلك ....
رد طبيش وهو متوجه لخارج الخيمه : أما ينيلني .. والله لو اني ثوب ..!!




وبعد ماطلع طبيش من خيمة أمه لقى بنت شعرها منكوش وشفايفها مشققه ووجهها كله غبار وملابسها وصخه وواقفه قدام الخيمه .. قرّب طبيش من البنت وهو مذهول من شينها .. قالت له البنت : كيف حالك ياطبيش ..؟؟
رد طبيش بارتباك : والله من زمان كل يوم وانا دايم كذا وانام بدري وعليكم السلامات ماتشوفين شر ..!!
ردت البنت باستغراب : وش تقول أنت ..؟؟
طبيش : والله مادري بس حسيت بودخه يوم شفتك ..!!
البنت : كذا ياطبيش تغيب كل هالسنين ولا تسأل عني ..!!
طبيش ومازالت آثار الذهول على وجهه : وش اللي اسأل عنك .. والله لو انك مفاتيح سيارتي ..!! واستدرك طبيش نفسه وقال : مين انتي ..؟؟
البنت : أنا بنت الشيخ فجحان ..
طبيش : طيب وش اسمك ..؟؟
البنت : اسمي وضحى ..
طبيش : أنا أبي اسمك مابي عيارتك ..!!
البنت : اسمي وضحى .. نسيتني ياطبيش .. نسيت يوم كنا صغار وماكنا نفترق إلا وقت النوم ...
طبيش : وانا أقول ليش دايم أحس إن طفولتي وصخه ..!!
نزلت البنت راسها من الخجل وقالت : الله يخليك ياطبيش انتبه لنفسك وارجع لنا بسرعه لأن ابوي مصمم يزوجني من ولد عمي سند ...
رد طبيش بدلاخه : طيب وانا وش دخلني في السالفه ..؟؟
طلعت وضحى سكين من ملابسها وحطتها على رقبة طبيش وقالت : وش اللي وش دخلك انت وجبهتك .. هاللحين انت ماقلتلي واحنا صغار انك بتتزوجني .. وانا من هذاك اليوم وانا أرد العرسان عشانك وتجي هالحين وتقول وش دخلني ..!!
رد طبيش بخوف : طيب يمكن إني كنت أمزح معاك ..!!
ردت البنت بصوت مرتفع : إمزح عند أمك موب عندي .. وعلمن يجيك ويتعداك .. أنا مانيب متزوجه إلا أنت غصبن عليك فاهم ولا لا ..؟؟
طبيش بخوف : طيب طيب باتزوجك بس وخري السكين ....
ووخرت وضحى السكين وراحت من قدام طبيش .. وطبيش مازال في حالة ذهول ويقول لنفسه : يلععععععععن أم القبيله اللي كل شي فيها بالغصب ..!!




رجع طبيش لخويه الكندره وركبوا خيولهم وكان في وداعهم الشيخ فجحان وافراد قبيلته .. وقال الشيخ فجحان لطبيش : اسمع ياطبيش .. اذا واجهتم مشكله طرشلي مرسال ..
رد طبيش .. والله ما أقدر أطرش لك مرسال ياشيخ .. لكن إذا تبي أطرش لك مرقوق ولا أطرش بيض وطمام ابشر ..
قال الشيخ فجحان بعصبيه .. طرش مرسال يعني أرسل لي خويك ياثور .. واسمع أنت وخشتك ياويلك لو ترجع بدون ثار ابوك .. ولا تشيل هم أمك .. انا باحطها في عيوني ..
قال طبيش .. أما تحطها في عيونك .. عدسات هذي ميب أم ..!!! وعصب الشيخ فجحان وقال : انقلع الله يلعن هالوجه يالرخمه ....
وانطلق طبيش والكندره بخيولهم وسط سب وشتم ولعن من الحاضرين ..




وفي الطريق قال الكندره لطبيش : وش نسوي في هالبلوه ياطبيش ..؟؟
رد طبيش : والله مادري .. بعدين أنا جايبك معاي عشان تساعدني .. حاول تفكر لنا في حل ..
قال الكندره : خلاص أنا بافكر في حل يطلعنا من هالورطه ..

وبينما الكندره يفكر نام وهو فوق الخيل .. والتفت له طبيش ولقاه نايم .. اقترب طبيش من الكندره ومحطه على راسه وقال له : هاللحين أقول لك فكر في حل وتنام ..!!
رد الكندره وهو مذعور : معليش معليش .. لكن ياطبيش أنا كل ماحاولت أفكر أنام لأن مخي مايتحمل التفكير ..
رد طبيش بعصبيه : والله إني داري إن مخك مافيه إلا مناديل وغطيان بيبسي .. لكن أمش وانت ساكت ولاعاد تحاول تفكر ..!!




وبعد فتره من المسير وقف طبيش والكندره عشان يستريحون ويطبخون عشاهم .. وقال طبيش للكندره : وش تبينا نسوي عشا ..؟؟
رد عليه الكندره : والله أنا لي نفس في مكرونه ..
قال طبيش : المشكله إن مامعنا إلا رز بس .. كننا عمال اندنوسيين ..
رد عليه الكندره : والله مشكله .. لأني ما أحب الرز ..
قال طبيش : طيب خلاص أنا بسوي لنا رز واعتبره مكرونه ..
رد الكندره بفرح : إيه كذا تمام لأني ما أداني الرز ..!!



وبعد ان تعشى طبيش والكندره انسدحوا جنب بعض عشان ينامون ويكملون مشوار البحث عن محماس في الصباح ..
وبينما هم منسدحين قال الكندره لطبيش : انت لك في النت ياطبيش ..؟؟
قال طبيش : لا والله انا حدي آله حاسبه ..
رد الكندره .. آآآآآه ياطبيش النت هذا بلاوي ..!!
قال طبيش بحماس : ليش وش صار لك ..؟؟
رد الكندره وهو مستلقي على ظهره ويطالع النجوم .. انا تعرفت على وحده في النت وحبيتها .. كنت كل يوم أدخل ألعب انا وياها في النت ...
قال طبيش : وش تلعبون ..؟؟
رد الكندره : نلعب لعبه اسمها الكوبه .. وحده اسمها هناء فديت قلبها .. بنت محترمه ياطبيش .. تصدق ماتلعب معاي إلا واخوانها معانا .. واحد اسمه أشرف والثاني اسمه سمير .. عشان كذا ماقدرت أعترف لها بحبي لها .. وهي تلعب بدون ماتقول ولا كلمه لأنها خايفه من اخوانها .. ولي سبع سنوات ياطبيش وانا على هالحال .. ما أقدر اصارحها بحبي لها .. وهي ماتقدر تعترف بحبها لي قدام أشرف وسمير .. علمني ياطبيش وش اسوي وكيف اتصرف معاها ..
والتفت الكندره على طبيش ولقاه نايم .. والتفت الكندره على الجهه الثانيه ونام هو بعد ..




وفي الصباح قام طبيش والكندره وهم مفجوعين على صوت خيول وناس محاصرينهم .. وقف طبيش والكندره واقترب منهم شخص كبير الجسم وتظهر عليه ملامح الإجرام وقال لهم : وش عندك هنا انت وياه ..؟؟
رد طبيش وهو ينتفض من الخوف : ماعندنا شي بس جايين نقتل واحد اسمه محماس وبنمشي ماحنا مطولين ....
نظر الرجل الضخم إلى باقي الرجال باستغراب ثم انفجروا ضحك .... قال الرجل وهو مازال يضحك : انتم بتقتلون محماس ..؟؟
رد طبيش : ايه بنقتله سريع سريع وبعدها أقسم بالله ماعاد نجي حارتكم ....
قال الرجل : ماعاد تجون حارتنا هاااه .. طيب وليش بتقتلون محماس ..؟؟
وهنا تدخل الكندره بحماس : ياخي لأنه مايستحي وقتل ابو طبيش .. بالله عليك انت ترضى أحد يقتل ابوك .. من جد حركات بزران ....
وفي هذه اللحظه أشر الرجل الضخم لرجاله برأسه ... وبعدها قام الرجال بتقييد طبيش والكندره وربط أعينهم بأشمغتهم وأخذوهم معهم لمكان مجهول ..





وفي الطريق قال الكندره لطبيش : ياخوي شكل هالرجاجيل دلوخ .. وش فيهم حاطين أشمغتنا على عيوننا .. شكلهم حولان ..!!
رد طبيش : وش عرفك أنت .. هذي الموضه الجديده .. لنا اربع مية سنه واحنا نلبس الشمغ على روسنا .. خلاص ملينا ولازم نغير ..!!
قال الكندره : والله انك صادق .. بس تصدق إني اكتشفت شي خطير ..!!
رد طبيش : وش اكتشفت يانيوتن ..؟؟
قال الكندره : اكتشفت انك إذا حطيت الشماغ على عيونك ماتشوف شي ..!!
رد طبيش : ولله انك ذكي .. وانا من دلاختي أحسبني نايم لأني ماشوف شي ..!!




وصل الرجاجيل إلى أحد الأوديه ومعهم طبيش والكندره .. وأمر الرجل الضخم رجاله أن يربطوا طبيش والكندره في أحد الأماكن وأن يزيلوا أشمغتهم عن عيونهم ..
نظر الكندره إلى طبيش بعد أن قام الرجال بإزالة الأشمغه عن أعينهم وقال له : تتوقع وش يبون منا هذولي ..؟؟
رد عليه طبيش : يارجال الوضع مايطمن .. أنا من يوم شفت وجه رئيسهم وانا شاك في الوضع .. لكن أهم شي لا توضح لهم انك خايف ..
قال الكندره : بس ياطبيش أنا خايف ..
رد عليه طبيش : يارجال لا توسوس يمكن انك عطشان وتحسب انك خايف ..
قال الكندره : والله انك صادق .. أعوذ بالله من الوسواس ..





وجلس طبيش والكندره طول الليل مربوطين في مكانهم وسط حراسه من خاطفينهم .. وفي صباح اليوم التالي اقترب الرجال من طبيش والكندره وفكوا وثاقهم واقتادوهم لمجلس رئيسهم في وسط الوادي .. وبعد أن جلسوا أمام الرئيس سألهم الرئيس : كيف كانت ليلتكم ..؟؟
رد طبيش : أبد طال عمرك إحنا متعودين على النوم بين الوحوش ..!!
قال لهم الرئيس : ماشاالله شكلكم من الشجعان ..!!
رد الكندره بسرعه : لا والله إحنا من الرياض بس جينا هنا للبر عشان نذبح واحد وبنرجع ..!!
قال الرئيس : من الرياض هاااه .. طيب عطوني من قصص بطولاتكم ..
قال الكندره : والله كثيره .. بس أقوى وحده إني مره كنت أمشي في الصحراء في الليل لحالي وفجأه طلع لي سمكة قرش كبيره.. ودورت في جيبي أي شي عشان أذبحه ومالقيت إلا ولاعه ...........
وقاطعه الرئيس : لحظه لحظه أنت وخشتك .. تلعب علينا أنت .. وش اللي جاب سمكة القرش للصحراء ..!!
رد الكندره : عادي وش المشكله ..!!
قال الرئيس : ياخوي سمك القرش يعيش في البحر وش يجيبه للصحراء ..!!
رد الكندره : طيب عادي هذا أنا أعيش في الرياض وجيت للصحراء عادي ..!!
عصب الرئيس وقال : يارجال كل شحم .. تسولف على سكارى أنت .. انكتم وخلنا نشوف بطولات خويك ..
قال طبيش : والله ياطويل العمر أنا بطولاتي لاتعد ولا تحصى .. ومن يوم اخترعوا الإنسان وانا أكثر واحد له بطولات في العالم ..
قاطعه الرئيس : بتجنني أنت وياه .. وش اللي اخترعوا الإنسان .. تلفزيون هو عشان يخترعونه ..!!
وكمل طبيش سالفته : المهم إني مره كنت أمشي في الصحراء لحالي .. وفجأه طلع لي خنتوس كبير .. وانا اللي أطلع السيف من جيبي ....!!
وقاطعه الرئيس بغضب وقال : أول شي وش ذا السيف اللي حاطه في جيبك .. قلم ذا موب سيف .. ثانياً وش الخنتوس ذا ..!!
رد طبيش بربكه : والله مادري وشو الخنتوس بس خفت أقول لك إسم حيوان معروف وتقول لي إنه مايعيش في الصحراء ..!!
قال الرئيس بغضب : الله يلعن من جمعكم أنت وياه .. أسولف مع بزران أنا .. قول سالفه تدخل المخ لا اقوم اتوطى في بطنك ..
قال طبيش : طيب طيب .. مره كنت نايم في الصحراء وسمعت صوت يقول مياااااو ميااااو .. قلت أكيد هذا الأسد اللي يقولون ..
قال محماس : وش ذا الأسد اللي يقول ميااااو .. سكران أنت ..
وتدخل الكندره وقال : إيييه يمكن إنه ذيب ..!!
قال محماس : ماودك تآكل تراب أنت وتنكتم ..
قال طبيش : المهم إن صوت الأسد كل شوي يقرب مني .. وشفت خرطوم الأسد في الظلام ..
وعصب محماس وقال : ياخوي بتسبب لي إنفصام في الشخصيه أنت .. من وين صار للأسد خرطوم .. وش ذا الأسد المشّوه ..!!
وطبيش كان متحمس مع سالفته وكمل بدون مايلتفت لكلام محماس : المهم وطلع الأسد قدامي وجهاً لوجه .. وانا اللي أمسك الأسد مع قرونه ...
وقاطعه محماس مقهوراً : خلاااااااااص .. يرحم أمك خلاص .. جاني ارتجاج في المخ من سالفتك الخايسه لكن الشرهه ميب عليكم .. الشرهه علي أنا اللي اسألكم .. المهم أنت وياه علموني وش مشكلتكم مع محماس بالضبط وليش تبون تقتلونه ..؟؟
رد عليه طبيش : محماس هذا قتل ابوي وفلذة كبدي شداد .. محماس هذا سرق مني البسمه .. قطع الأمل في حياتي .. دمّر مستقبلي .. إلى الجحيم يامحماس ..!!
قال رئيس العصابه : ياخي حسستني إني أتابع مسلسل مدبلج على هالكلام .. طيب وش دراك إن محماس هو اللي قتل أبوك ..؟؟
وفي اللحظه ضحك الكندره وقال : الله يرجك طال عمرك ضحكتني .. وصدق المثل اللي يقول .. شر البلية ماقل ودل ..!!
رد الرئيس بغضب : جالس أنكت معاك أنت وجبهتك .. وبعدين حاول ماتقول أمثال لا ألعن والديك .. أنا سألتكم كيف عرفتوا إن محماس قتل أبو طبيش ..؟؟
جاوبه الكندره : واضحه ومايبيلها ذكاء .. واحد إسمه محماس تتوقع بيكون طبيب أطفال .. أكيد بيكون مجرم وحرامي ..!!
وفي هاللحظه غضب رئيس العصابه وقام من مكانه ومسك الكندره مع حلقه وقال له : أنا محماس اللي تدورون عليه ..!!
وانصدم طبيش من كلام رئيس العصابه وحس إنهم توهقوا .. بينما الكندره كانت عيونه طالعه ووجهه أحمر بسبب خنق محماس له .. وقال الكندره لمحماس بصوت مبحوح : طيب فك وافك ..!!
ورمى محماس الكندره بجانب صديقه طبيش .. وبعد أن سقط الكندره على الأرض اقترب من طبيش وقال له بصوت خفيف : شفت كيف لعنت والديه ..!!
رد طبيش بخوف : يارجال كلك تبن وخلنا نشوف وش نسوي في هالمصيبه ..!!

وقال لهم محماس : شوف أنت وياه .. أنا أقدر اذبحكم وارميكم للكلاب .. لكن أنا أحس إنكم ملعوب عليكم .. لأني ماقتلت ابوك .. وأنا أعرف ابوك شداد لأنه أنقذ حياتي في يوم من الأيام ........... وجلس محماس يتذكر كيف أنقذ ابو طبيش حياته ..


كان محماس يركض في الصحراء في حاله مزريه .. ووجد شداد ابو طبيش يرعى إبل الشيخ فجحان .. واقترب محماس من شداد وطلب منه أن يساعده لأن خلفه فرسان يحاولون قتله .. فقال له ابو طبيش : خلاص أنت سو نفسك بعير وارعى مع الإبل واذا جو الفرسان باصرفهم ..!!
وفعلاً دخل محماس بين الإبل وجلس يآكل معاهم من نباتات الصحراء .. وجاء الفرسان على خيولهم واقتربوا من ابو طبيش وقالوله : ماشفت رجال هارب ..؟؟
رد عليهم ابو طبيش : لا والله ماشفت شي ..
وانتبه أحد الفرسان لمحماس بين الإبل .. وقال لابو طبيش : وش ذا اللي بين الابل ..؟؟
قال ابو طبيش : هذا بعير مشوّه بسبب المعاصي ..!!
رد عليه الفارس : سبحان الله .. والله لايبلانا ..!!
وغادر الفرسان المكان بحثاً عن محماس .. بينما محماس سلم على رأس ابو طبيش لأنه أنقذ حياته بحيلته الذكيه ..



انتهى محماس من تذكر موقفه مع ابو طبيش عندما أنقذ حياته .. وكمل كلامه لطبيش والكندره : عشان كذا أنا راح اساعدكم واوقف معاكم ..!!
رد الكندره : كيف توقف معانا واحنا جالسين ..!!
قال محماس بغضب : ترى بادعس على وجهك لو حاولت تستخف دمك مره ثانيه ..!!
خاف الكندره من كلام محماس بينما طبيش كان منزل رأسه ورفعه فجأه وقال لمحماس : يعني يامحماس إنت ماتبينا نقتلك هالحين ..!!
رد محماس : يارجال والله ماتقتل دجاجه أنت وخويك .. لكن أنا ماقتلت أبوك .. ولأن ابوك انقذ حياتي فأنا باساعدكم عشان أرد جميله علي .. بس انتم علموني من اللي قال لكم إني أنا اللي قتلت ابوك ..؟؟
رد طبيش : الشيخ فجحان قال لنا انك انت اللي قتلت ابوي ..
قال محماس : الشيخ فجحان .. أكيد الموضوع فيه إن .. لكن خلونا نرجع لقبيلتكم ونتجسس عليهم عشان نعرف وش الموضوع ..!!




غادر محماس ورجاله الوادي ومعهم طبيش والكندره متوجهين إلى قبيلة الشيخ فجحان .. وبعد أن اقتربوا من قبيلة الشيخ فجحان اختبئوا حتى حلول الليل .. وقال محماس لمن معه : خلونا نتخبى هنا اللين يجي الليل وبعدها نتسلل للقبيله ونحاول نعرف أي معلومه عن اللي ذبح ابو طبيش ..
قال طبيش : حتى لو عرفنا اللي قتل ابوي .. أنا ماراح أصالح إلى إذا رجعولي ابوي حي ..!!
رد عليه محماس : يارجال كلك تبن .. مسوي الزير سالم أنت وراسك .. نزل الأغراض مع الرجاجيل ولا يكثر ..



وبعد أن جلس الجميع قال محماس لطبيش والكندره : تحفظون شي من القصيد ..؟؟
وقفز الكندره وقال : أنا عندي قصيده بنت كلب ماحد يعرفها ..
قال محماس : يالله قول وش عندك مع إن من يشوف وجهك مايرجي من وراك قصايد ..
وقف الكندره في الوسط بين الجالسين وقال : أنا البندوره الحمرا مزروعه بين الخضره .. تآكل مني وماتشبع وتصير خدودك حمراااااا ..
وفصخ محماس نعاله ورماها على الكندره .. الذي وقف مكانه خائفاً .. وقال محماس : تبيني ألعن والديك أنت .. رجاجيل جالسين ومحترمينك وآخرتها أنا البندوره الحمرا .. بتجنني أنت ..!!

وقام طبيش وجلّس الكندره مكانه وقال : ماعليك طال عمرك صديقي الكندره متأثر بموت ابوي عشان كذا قام يخربط .. لكن أنا اللي باقولك قصيده أتحدى إن كنت سمعتها ..
قال محماس : يالله هات اللي عندك ..
قال طبيش : يابابا اسناني واوا وديني عند الطبيب .. ماعاد بدي شوكلاته بس بدي أشرب الحليب ..
وفي هاللحظه قام محماس وطرح طبيش على الأرض وخنقه وهو يسبه ويلعنه .. وقام الرجاجيل محاولين إبعاد محماس عن طبيش عشان مايذبحه .. والكندره يصيح ويقول : فكه ياطبيش فكه الرجال موب قدك ..!!
قام محماس من فوق طبيش بعد ماسمع كلام الكندره وقال للكندره : أحول أنت .. هالحين أنا اللي خانق خويك وانت تقول فكه ياطبيش ..!!
قال الكندره : ايه لأن صديقي طبيش كان ماسك يدك برقبته وخفت إنه يكسر يدك ولا يسوي فيك شي ..!!
وعصب محماس وقام يرفس الكندره وهو يصيح ويقول : بيهبلون فيني هذولي .. بيجننوني ..
وقام الرجال بتهدئة محماس وابعاده عن طبيش والكندره ..




وبعد حلول الليل تسلل محماس وطبيش والكندره للقبيله .. وتوجهوا لخيمة الشيخ فجحان ليسمعوا مايدور فيها من حديث .. وكان الشيخ فجحان يجلس مع ولد أخوه سند في الخيمه ..

الشيخ فجحان : مافيه أخبار عن طبيش وخويه ياسند ..؟؟
سند : مافيه أخبار ياعمي .. لكن لا تشيل هم ياشيخ أكيد بتجي أخبارهم قريب وبيتحقق اللي خططت له ..
الشيخ فجحان : والله انه غبي طبيش .. صدّق إن محماس هو اللي قتل ابوه .. مايدري إني أنا اللي طلبت منك ياسند تقتل ابوه عشان أتزوج أمه حنفيه عشان أتقرب من أخوها الشيخ حنفي واسوي علاقات تجاريه بين قبيلتنا وقبيلته ..
قال سند : والله انك ذكي ياشيخ .. قتلنا شداد وبعدها لعبت على طبيش وخليته يروح لمحماس .. وأكيد محماس بيقتل طبيش وخويه .. وبكذا تكون تخلصت من شداد ومن ولده طبيش وتصير حنفيه لحالها وماحد يعارض زواجك منها .. بس لا تنسى الخمسين ناقه اللي وعدتني فيها .. ولا تنسى تزوجني وضحى ..
قال الشيخ فجحان : لا تخاف باعطيك اللي تبي .. بس خلني أتزوج حنفيه وبتشوف الخير ..
وضحك الشيخ فجحان وسند ضحكة الشر .. بينما طبيش ومحماس والكندره مختبئين خلف الخيمه وسمعوا الكلام كله ..



وبينما محماس وطبيش والكندره يستعدون لمغادرة المكان والعوده إلى موقعهم رأتهم وضحى بنت الشيخ فجحان وصاحت : طبييييييييش ..!!
وعلى الفور هجم عليها محماس وسد فمها بيده وأخذها معهم لكي لا تفضحهم ..


وبعد أن عاد الجميع إلى مكانهم ومعهم وضحى .. أخبروا وضحى بالقصه كامله .. قالت وضحى : أنا ماهمني أبوي .. أهم شي إن طبيش يتزوجني ..!!
قال طبيش : طيب باخلي الكندره يتزوجك ..
قال الكندره : لا لا لا أنا مشغول ومواعد واحد من العيال ..
قال طبيش : والله لو إني عازمك على عشا .. ياخوي تزوجها وانا باساعدك ..
قالت وضحى بغضب : خير أنت وياه .. والله لو إني شاورما عشان تتعازمون علي .. أنا ماني متزوجه إلا طبيش لأنه شافني وانا نايمه ولازم يصلح غلطته ..
قال طبيش : الله أكبر ياسندريلا هاللحين .. انا أول مره أشوف وحده تنام وهي واقفه ..
قالت وضحى : أنا انام واقفه عشان إذا أحد غلط علي في الحلم ألحقه والعن والديه ..!!
قال طبيش : يلعععععن أم العربجيه .. حتى اللي في حلمك تطقينهم .. أجل افلقنيني إذا أحد مثّل في حلمك .. تلقين أحلامك كلها أماكن وديكورات ومواقع بس مافيها ممثلين خايفين منك ..
قالت وضحى : اهم شي لاتصرف الموضوع وبتتزوجني غصبن عليك ..

وتدخل محماس وقال : تراك غثيتنا أنت وملكة جمال ساحل العاج هذي .. واهم شي ياطبيش انك عرفت إني بريء من دم ابوك .. وان الشيخ فجحان هو اللي ذبح ابو ولعب عليك عشان يتزوج أمك ..
قال طبيش بغضب : ماحد بيتزوج أمي غيري ..!!
قال محماس : يهودي أنت .. وش اللي ماحد بيتزوج أمي غيري .. تبي تتزوج أمك الله لا يبارك فيك ..
قال طبيش : قصدي ماني مخلي الشيخ فجحان يتزوج أمي وبانتقم منه ..
قال محماس : خلونا ندور خطه عشان نقدر نكشف الشيخ فجحان قدام كل القبيله ..

وقام الكندره يفتش في جيبه ويدوّر في الأرض ويفتش الأغراض .. قال له محماس : وش فيك ..؟؟
قال الكندره : أدوّر خطه ..!!
وعصّب محماس وقام مسك الكندره وجلسّه وقال له : ترى بالعن أمّك .. مجنون أنت .. أنا أقول دوّر خطه ماقلت دوّر مفاتيح .. إجلس هنا ولا تتحرك وخلونا ندوّر حل لمشكلتكم ..
وقام طبيش يفتش في جيوبه .. قال له محماس : وش فيك أنت بعد ..؟؟
رد طبيش : أدوّر حل ..!!
عصب محماس ومسك طبيش وقال له: اجلسسسسسسسسس ياثور..
وقامت وضحى ومسكت محماس من حلقه وطلعت سكين وحطتها بين عيونه وقالت له : لو مديت يدك مره ثانيه على حبيبي طبيش باكسرها وأعلقها في رقبتك ..!!
رد محماس وهو يتألم : وش الرجال هذي .. خلاص قسم بالله ما أعيدها ..
قال طبيش : وش فيك أنت عصبي يامحماس .. تحمد ربك إننا ماقتلناك إلين هالحين .. ومخلينك تعيش في البراري بسلام ..
رد محماس : أما أعيش في البراري .. والله لو إني خروف .. أقول تلايط بس وخلونا نفكر ..
نط الكندره وقال : طيب ليش مانربطك ونوديك للقبيله ونقول لهم إننا مسكناك بس ماراح نقتلك إلا لما نتأكد إنك قتلت أبو طبيش .. عشان نواجه الشيخ فجحان ونكشف كذبه قدام الناس ..
أعجب محماس بخطة الكندره وقال : والله فكره ذكيه .. وغريبه طلعت منك ..!!
قال الكندره وهو مستانس : إيه أصلاً انا عندي خطط كثيره بس مخليها لوقت الحاجه ..
قال محماس : وش عنده مورينهو .. قال ايش قال خطط كثيره .. المهم الفكره حلوه وبكره الصبح بننفذها .. وانتي ياوضحى إرجعي للقبيله عشان مايحسون بغيابك .. ولا تعلمين أحد باللي شفتيه وسمعتيه ..




رجعت وضحى للقبيله .. وفي الصباح توجه طبيش والكندره لقبيلة الشيخ فجحان وهم ممسكين بمحماس اللذي كان مربوط .. ولما رأوهم أفراد القبيله وهم ممسكين بمحماس اجتمعوا كلهم لإستقبالهم .. وسط استغراب من الشيخ فجحان وسند الذين لم يتوقعوا أن يستطيع طبيش والكندره من إمساك محماس .. وبعد أن وصل طبيش والكندره للقبيله وسط صيحات التشجيع من رجال القبيله .. سلمّوا محماس للشيخ فجحان وقال طبيش : هذا اللي قتل ابوي ياشيخ ..
قال الشيخ فجحان : طيب ليش ماقتلتوه ..؟؟
رد الكندره بحماس : لأني أنا قلت لهم خطه عشان نلعب عليكم ........
وقاطعه محماس بسرعه قبل مايجيب العيد : هييييييه وش خطته ياحمار .. هو يقصد ياشيخ إنهم ماقتلوني لأني ماقتلت ابو طبيش .. وانا قلت لهم تأكدو قبل ماتذبحوني .. عشان كذا هم جابوني هنا أسير عندكم إلين يتأكدون ..!!
رد الشيخ فجحان : وش اللي يتأكدون وخرابيط .. ماحد قتل ابو طبيش غيرك .. يالله ياطبيش خلك رجال واقتله وخذ ثار ابوك ..!!
أخذ طبيش السيف وقرب من محماس .. طالعه محماس بخوف واستغراب وقال له : خير خير خير إحنا وش اتفقنا عليه ..؟؟
قال طبيش : وش أسوي هم أحرجوني ولازم أقتلك ..!!
رد محماس : وش اللي أحرجوني .. استهبال الدعوه .. تذبحني وتقول أحرجوني ..!!
وتدخل الكندره وقال : لا ياطبيش خطتي إننا نلعب على الشيخ فج.....
وقاطعه محماس بسرعه : آآآآآآآآآآآآآ قصدك إننا اتفقنا أنكم ماتذبحوني إلا بعد ماتتأكدون إني قتلت ابو طبيش .. الله يلعن أمها حاله بتنكبونا انتم الأثنين ..!!
رد الكندره في محاوله للإستضراف : احنا الاثنين والا احنا الخميس ..!!
قال محماس : حظك إني مربوط ولا كان لعنت والديك انت ودمك الخفيف ..
وقال الشيخ فجحان : خلاص معاك أربع وعشرين ساعه تثبت برائتك .. وبعدها بنقتلك لو ماقدرت تثبتها .. وبنربطك في خيمة الضيوف جنب خيمتي إلين بكره ..



وطلب الشيخ فجحان من رجاله ربط محماس في خيمة الضيوف وحراسته حتى يحين موعد القصاص ..
نظر محماس في طبيش والكندره وقال لهم : هالحين وش الخطوه الجايه في خطتك يالكندره .. وكيف بتثبتون برائتي ..؟؟
قال الكندره : والله مادري .. أنا بس خطتي إننا نربطك ونجيبك للقبيله ..
قال محماس : يعني ماعندك خطه كيف نثبت برائتي ..؟؟
قال الكندره : لا والله ما أمداني أفكر لأني مشغول شوي .. بس بكره باحاول أساعدك ..
رد محماس بعصبيه : وش اللي بكره .. جاي اراجع معامله عندك أنت وجبهتك .. الرجاجيل بيذبحوني وانت تقول بكره .. والله إني كنت حاس إن نهايتي بتكون بسببكم يالجحلط ..




وسحب الحراس محماس وتوجهوا إلى خيمة الضيوف لربطه هناك .. بينما طبيش والكندره توجهوا لخيمة أم طبيش ليستريحوا .. وكان في إستقبالهم أم طبيش ومعها وضحى وعدد من بنات القبيله .. واستقبلوهم بالزغاريد والغناء : وادحرج واجري يالله .. وتعالى على حجري يالله ..... وتحمس طبيش والكندره وقاموا يرقصون أمام الفتيات حيث ربط طبيش شماغه على وسطه وقام يرقص رقص شرقي بينما الكندره جلس على الأرض ورقص رقصة دقني دقني ..!!



وبعد أن انتهت مراسم الإستقبال .. غادرت الفتيات المكان وبقي طبيش والكندره مع أم طبيش .. وقالت أم طبيش : انت رفعت راسي يابني وقدرت تاخذ ثار ابوك ..!!
رد طبيش : خلي عنا يمه رفعت راسي وهالخرابيط .. وعلميني وش علاقتك بالشيخ فجحان ..؟؟
ردت أم طبيش : آآآآه يافئحان .. دا هو اللي مصبرني على العيش في الئبيله المعفنه دي .. دا بيقيني الخيمه كل يوم ...
قاطعها طبيش بغضب : وش هالأم اللي رايحه فيها ذي .. وتقولينها قدامي بعد .. والله لو إن اسمي طوني موب طبيش عشان تقولين هالكلام قدامي ..!!
ردت أم طبيش بغضب : إييييه إنتا راح تفكيرك فين ياوسخ .. انا أصدي هو اللي بيقي كل يوم عشان يسأل عني ويشوف في حاقه نأصاني ..
قال الكندره : أعتبر هذا وعد ..!!
رد أم طبيش : إيه اللي تعتبرو وعد ياراجل نص استوا انتا ..!!
قال طبيش : يمه لا تحاولين تصرفين الموضوع واعترفي لأن الإنكار ماراح يفيدك ..!!
قالت أم طبيش : إيه الكلام ده انتو اتهبلتو .. أوم إطلع انتا وهوا لاحسن أرتكب فيكم جريمه .. براااااااااا ..!!



طلع طبيش والكندره من خيمة أم طبيش وقال الكندره : وش ذي القبيله اللي كلهم معصبين ..؟؟
قال طبيش : يارجال هم كذا يدورون أي واحد عشان يضربونه .. لو تعيش معاهم اسبوع بيورم وجهك من كثر التبقيس اللي بيجيك ..
قال الكندره : بس تصدق ياطبيش أمك شكلها صغيره وحلوه ..
رد عليه طبيش : وين حلوه معه هي ووجها الكبير .. من كبر وجهها تشوف ملامح وجهها حتى وهي معطيتك ظهرها .. أمش بس خلنا ننام شوي عشان نقوم ونشوف حل في مشكلة محماس ..




ونام طبيش والكندره في مجلس خيمة أم طبيش .. ومر الوقت بدون مايشعرون وتفاجئوا بأم طبيش تصحيهم من النوم وتقول لهم : أوم انتا وهوا روحوا لخيمة الشيخ فئحان عشان تحضروا ذبح محماس ..
وقام طبيش والكندره وهم مفجوعين لأنهم راحت عليهم نومه وتركوا محماس بدون إثبات برائته .. ولبسوا ملابسهم وتوجهوا لخيمة الشيخ فجحان .. ولقوا الشيخ فجحان وجميع أفراد القبيله مجتمعين وبينهم محماس مربوط .. وأول ماشافهم محماس سألهم : هاااه لقيتوا دليل برائتي ..؟؟
قال طبيش : معليش نسينا والله وراحت علينا نومه ..!!
قال محماس بعصبيه : وش اللي معليش نسينا .. والله لو إني قايلكم جيبوا ملابسي من المغسله .. الرجاجيل بيذبحوني وانتم تقولون راحت علينا نومه ..!!
قال الكندره : يارجال لا تصير خواف انت عاد وخلك رجال ..
رد عليه محماس : وش اللي لا تصير خواف والله لو انهم بيعطوني إبره .. أقولك الرجاجيل بيذبحوني ..!!
قال طبيش : يامحماس ترى الموت حق .. وخل إيمانك بالله قوي .. واذا كنت مظلوم فجزائك الجنه ..
قال محماس بقهر : مسوي العريفي أنت وخشتك .. شوفولكم حل وطلعوني من هالورطه ..



واقترب منهم الشيخ فجحان ومعه السيف .. وقال لهم : خلاص جا وقت القصاص وما قدرت تثبت برائتك يا محماس ..
قال محماس : وش لون أثبت برائتي وانا مربوط .. فكوني وعطوني مهله وانا أثبت لكم برائتي ..
قال الشيخ فجحان : ميب مشكلتي .. ومافيه مهله ثانيه .. والموت فيك فيك ..
ورفع الشيخ فجحان سيفه لقتل محماس وسط تشجيع أفراد القبيله .. وفجأه سمع الجميع صوت يدوي ويقول : وققققققققف ..!!
وقف الجميع لمشاهدة مصدر الصوت .. الذي كان صوت وضحى بنت الشيخ فجحان اللتي شقت الصفوف وهي تسحب سند ولد عمها الذي كان مربوط .. وقف الجميع في ذهول .. ووصلت وضحى أمام الجميع وقالت : سامحني يابوي لكن أنا ما أرضى تقتل محماس بدون ذنب ولازم الكل يعرف الحقيقه .. يالله ياسند قول مين اللي قتل أبو طبيش ..؟؟
قال سند : أنا اللي قتلته بأمر من الشيخ فجحان ..
وتعالت أصوات أفراد القبيله بعد سماعهم كلام سند ..
وصرخ الشيخ فجحان : تكذب يالخسيس ..
قال سند : إلا انت اللي أمرتني أقتل شداد أبو طبيش عشان تتزوج حنفيه ..
وساد الهرج والمرج بين أفراد القبيله ..
وصرخ محماس : يحيى العدل ..
قال طبيش : أٌقول بلا يحيى العدل بلا سامي العدل .. جالسين في محكمه إحنا .. ياحراس فكوا محماس واربطوا الشيخ فجحان ..
وفك الحراس محماس وربطوا الشيخ فجحان ..



وقال طبيش : أنا راح اسامحك ياشيخ فجحان بشرط .. إني آخذ الشيخه منك وأكون أنا الشيخ وآخذ كل أملاكك وحلالك وآخذ بنتك وضحى ..
قال الشيخ فجحان : وش رايك تآخذ سروالي بعد ..!!
قال طبيش : وش أبي في سروالك اللي ريحته بيض مسلوق .. المهم خلني أكمل شروطي .. وبرضه تشتغل عندي راعي عشان أذلك مثل ماذليت أبوي .. إذا وافقت على شروطي سامحتك واذا رفضت ذبحتك ..
قال الشيخ فجحان : موافق موافق ..
قال طبيش : وبالنسبه لسند فراح ننفيه من القبيله .. أما محماس بما إنه حرامي وقطّاع طريق فراح نطبق عليه الشرع ونقطع رجلينه ..!!
قال محماس : والله يانت تسمع بالشرع .. أنا أخبر الحرامي يقطعون يده موب رجله ..!!
قال طبيش : لا تحاول تصرف الموضوع قاطعين رجلينك يعني قاطعينها ..
قال محماس : خلاص والله أتوب بس تكفى فكني من أحكامك المخيسه ..
قال طبيش : خلاص مادامك بتتوب باسامحك واعينك قائد لجيش القبيله .. ورح لرجالك وجيبهم للقبيله يعيشون معانا .. أما صديقي الكندره بيكون ولي عهدي الأمين .. والليله راح يكون زواجي من العربجيه وضحى ..
قرب الكندره من طبيش وقال له : ياطبيش أنا ابي اتزوج أمك ..!!
طالع طبيش الكندره باستغراب وقال : استح على وجهك واحترم نفسك ..
قال الكندره : تكفى باتزوجها شوي بس وارجعها لك ..
قال طبيش : وش اللي تتزوجها شوي وترجعها .. سيكل هي .. وعلى العموم اذا وافقت أمي ماعندي مانع ..
ونطت أم طبيش وقالت : موافئه يابني أصلي مليت من الوحده والهواجيس ..
قال طبيش : أنا قايل من زمان إن أمي رايحه فيها .. خلاص بيكون عرسي على وضحى وعرس صديقي الكندره على أمي الليله ..

وتعالت أصوات الفرح بين أفراد القبيله ..

وفي الليل كان الجميع جالسين في مجلس الشيخ طبيش اللذي كان يلبس هو وصديقه الكندره البشوت ويجلسون في صدر المجلس وبجانبهم محماس .. وكان فجحان الشيخ السابق يصب القهوه للرجاجيل .. أما في خيمة الحريم كانت أم طبيش ووضحى يلبسون لبس العرايس وسط غناء وزغاريد النساء ..

وهكذا انتهت قصة ثار طبيش العظيمه .. القصة المليئة بالحكم والمواعظ ..



s n ! p e r